Melayê Cizîrî – Her di ber qalûbelayê belku ev ‘alem nebû

Her di ber qalûbelayê belku ev ‘alem nebû
Çerxê gerdan dewrê gerdûn gunbedê mîna nebû

‘Erş û kursî hêj di mexfî bûn di kenza qudretê
Husnê Heq bû di istiwayê lami‘a ‘işqê hebû

Nehtibûn hukmê sifatan ew ji zatê lem yezel
‘Aşiq û me‘şûq yek bûn şem‘ û hem perwane bû

Husn û hub zatekê qedîm in lê cuda bûn ew ji yek
Lê niha ismê hudûsê lê hukum tefsîle bû

Yek di zatê surşîrînan bû cemal û husn û sur
Yek di qelbê ehlê dil nar û cela lew cezbe bû

‘Aşiq û me‘şûq elheq herdu mir’atên yek in
Lew di ‘eynê cem‘ê da eslê qedîm ayîne bû

Hubb û husn anîn zuhûrê ‘işq e eslê ‘alemê
Eslê eşya da bizanî wan çi esl û madde bû

Cezbe û seyra sulûkê bêmehebbet nabitin
Cehdeya bê‘işq û hub çendî ku kir bêfeyde bû

Salikên ‘işqê yeka yek hewce nînin ez bibêm
Cameya pîrê terîqê ser ji nik şehzade bû

Reng reng ehlê meqamatê terîqê çûye seyr
Hin celal û hin cemalê sermeyan ev bade bû

Ê bûyî ‘eynê beqayê badenoşê ‘işqê bû
Ê bûyî mehwê fenayê ‘aşiqê bêçare bû

Êk ji wan perwane bû sot û fixanek jê nehat
Êk ji wan teşbîhê goyînê bi ah û nale bû

Awirên eswed‘uyûnan ‘aqilan sewda diken
Gezmeya ‘aşiq vi dil keftî ji çavên şehle bû

‘Aşiq û me‘şûq da wasil bi yek bin bêhicab
Mehwi bû bi’zzati ‘aşiq lew di ‘işqê perde bû

Lew di ‘işqê da fena bû da bibit baqî bi dost
‘Aşiqê baqî nebû wasil hetta fanî nebû

Nuqteyê ‘ilm û sewadê herf û neqşê ‘alemê
Ser didin me‘nayekê eslê sewadê nuqte bû

Her yek e û dê yek bimînit ewwel û axir yek e
La cerem nabin du bin ê dê bimînit her hebû

Her çi de‘wayê di ‘işqê da Melê sabit kirî
‘Eynê de‘wayê di nefsil’emri dîsa şehde bû