Melayê Cizîrî – Me lew fincan li ser dest e ku mehtab in hilalebrû

Me lew fincan li ser dest e ku mehtab in hilalebrû
Numayin min di mir’atê meya saf û zelalebrû

Te şîrîn û zîbayî te reftarî yû balayî
Binê nûn in di tuxrayî li bala herdu xal ebrû

Bila bit saimu’d-dehr û bila îftari carek bêt
Kes zanit ku ji dilber dê xweya bin her du sal ebrû

Meşî mestane reyhanî dilê min dî di amancê
Reşandî şîpeyek tîran bi qewsê her du mal ebrû

Sehergeh Mahsîmaya me çû gulşen bi seyranê
Li ser çavên Nîşanî da xiramê ew hilalebrû

Dibên xawerperest î tu nizanin min di keşfê da
Numayin min di şerqê nazika gerdenşemal ebrû

Tinê ma her terazû ne di babê husn û kêşayî
Hilalê xatema husn in li wê dêma bi xal ebrû

Me cewher ‘unsurek xas e numa îro di tali‘ da
Di vê teqwîmê insanî li tali‘ bûn hilal ebrû

Ji zunnara di dêrê da li hindava çelîpayê
Bi mihrabê me bir secde belê emma xiyal ebrû

Ji mabeyna du ebrûyan dibînim qabê qewseynî
Didit min terfetil‘eyni cewaba sed sual ebrû

Di batin secdegaha min ji secda herdu ebrû ne
Bi ‘eynê taqê mihrab in di ‘ilmê ehlê hal ebrû

Bi şîrînî bi zîbayî çi katib bû dikêşayî
Te‘alallah nîşan dayî çi wî şîrîn mîsal ebrû

Eger de’wayê Mûsayî di ‘işqê da bikem ca’iz
Melê daîm tecella ye ji wê terha şelal ebrû

Nişana qabê qewseynî çi qews avête ebsaran
Di teqwîma tecellayî di selwê bûn misal ebrû