Melayê Cizîrî – Mehbûb di dil da, me bi evrazi çi hacet

Mehbûb di dil da, me bi evrazi çi hacet
‘Enqa bi xwe bêtin firr û perwazi çi hacet

Ney dûr e hebîbê me bi firyad û fixan keyn
Wî guh li zemîra dil e awazi çi hacet

Go suxte, murada xwe ji min telbe ke îro
Min go, tu kerîm î ji te daxwazi çi hacet

Min nale refîq in xem û tehlî ne musahib
Firyad enîs in me bi demsazi çi hacet

Dildan û newaziş çi ne duşnam bes in min
Pur derd û cefa hurmet û î‘zazi çi hacet

Suhbet bi def û nayê hebîbê me nevêtin
Firyad û fixana me bes in sazi çi hacet

Raza me çi hacet tu ji xemmaz bizanî
Eşkên me bes in dîdeyê xemmazi çi hacet

Her lehze çi hacet ku bi nazan bikujî min
Cana jixwe qurbanê te bim nazi çi hacet

Ta çendî bi hecra xwe tu min tecrîbe înî
Zêrê ji xwe xalis mehekk û gazi çi hacet

Hacet niye cana yedê beyda bideranîn
Înkari di dîn da nebit î‘cazi çi hacet

Esrarê ezel dê di ebed bêne zuhûrê
Encamê serencamê ji axazi çi hacet

Ger lu’lu’ê mensûri ji nezmê tu dixwazî
Wer şi‘rê Melê bîn te bi Şîrazi çi hacet