Melayê Cizîrî – Peyweste du ebrû li me mehbûbê kişandin

Peyweste du ebrû li me mehbûbê kişandin
Sed gezme peyapey li ezê xeste reşandin

Tîrek ji kemanê xezebê da cegerê rîş
Mil dane ber û pir ji du goşan veweşandin

Cohtê esedan pence li ser sîne nihandin
Kullabi gihandin dil û hestî herişandin

Birhên te ji qudret ku numan goşe ji î‘caz
Peyweste kemanan li guhan goşe weşandin

Mihra te di canê me ji dil xef kiribû min
Dil çû ceger û sîne li ser canî ve şandin

Nûnên te hilalî bi qeran yek ji sura heq
Bê ‘eybi li dêmî qelemê xeybê keşandin

Neqqaşê ezel ismê cemalê ku nivîsî
Herfên di mucessem ji surê taze reşandin

Reyhanî û dîwanî û hem sulis û muselsel
Yek yek we hezar rengi li husnê neqqişandin

Ev ayetê nûrê ji Melê ra ku nivîsî
Katib ji surê nuqte bi zêrabê feşandin