Melayê Cizîrî – Xelqo li min ken şîretê ew dilbera zerrînkemer

Xelqo li min ken şîretê ew dilbera zerrînkemer
Min dî di halê xefletê hate der ji burcê wek qemer

Hate der ji burc û penceran dil girt û da ber xenceran
Evreng e halê dilberan lew ‘aşiqan xwûn bû ceger

Qelb û ceger min bûne xwîn lewra ji nû derbû birîn
Ey can were halim bibîn da rûh ji qalib bête der

Canê min î bê ser cesed mizgîn bi afaqan resed
‘Alem hemî dê ben hesed insan û cinn û canewer

‘Alem hemî têkbûne sef seyrîn bi şahê min bi xef
Hatin temaşa çar teref şatir xumar tayên di ber

Hat padişahê pursipah qametelîf dêm şubhê mah
Dad û meded sed ah û ah zulf û ‘eqarib bêne ser

Kuştîme xelqo ‘eqrebê mest im ji şewqa xebxebê
Ti tali‘ê min e kewkebê îro ‘eqarib bête der

Îro ‘eqarib hate xwar çû nêv baxê gul‘izar
Ew buxçeya her lê bihar her bulbulan lê qal û şer

Bêhed ji dil nalî ke‘îb da bexçeya ridwanê [x]eyb
Van naliyan nînin çu ‘eyb sotîne em dil bû seqer

Sotin li min cerg û hinav werdên di hûr girtî xunav
Zulf hate ser lê bû belav bayê nesîm weqtê seher

Tirsim muxalif ba detê zulfêt li dora cebhetê
Raket qiyam wê sa‘etê ‘alem bibit zêr û zeber

Zahir dibêjim pendigîr da dil nedî zulfa herîr
Şubhit Melê d’mînî esîr guhdêre qewlê mu‘teber